Galbahe taldea gara:
Eta kilkerbatzan lagun izan ditugu:
Mungiako Larrabizker estudioan grabatu genuen 2025eko ekainean hasi eta urriaren amaiera bitartean. Mariana eta Uxueren biolinak Urdulizko Tio Pete estudioan jaso genituen. Berba guztiak Galbahea poema liburukoak dira salbu eta Wafa kantakoak. Horren berbak Koldo Izagirrek sortu zituen (https://susa-literatura.eus/liburuak/poes4434). Musika: Taldekide guztion artean ondu genituen. Ametsek, Gorkak eta Maiak grabatu aurretik genituenak hobetu zituzten. Txoritxu txilibitaria, garia ereiteko Larrabetzun kantatzen zuten doinua da. Angeles Olealdekoari eta Maria Elosegiri ikasi genien: https://ahotsak.eus/larrabetzu/pasarteak/lar-001-003/. Belatzarenari piezaren doinua herriarena da, Xiberutarrei ikasi dieguna. Gaizka Sarasolak beretik moldatu zituen biak. Wafa kantarena Tapia eta Leturiarenetik moldatu dugu. Galbahea poema liburua irakurri edota entzuteko: https://susa-literatura.eus/liburuak/poes96 Ezkerrak: Etxekooi, maite zaituztegunoi, maite gaituzuenoi. Amets, Gaizka, Gorka eta Maiari. Lastrari. Susako Leire, Itziar, Josu eta Mikeli. Euskarazko kulturgintzan lanburkide zaituztegun guztioi. Poesia eta kantua maite dituzuenoi. Euskalduna izatea ez da aski Euskaldunak izatea ez da asko Euskalduna ez da aske |
Ez gara dena ahazteko
nahikoa biziko 2025
GALBAHE
|
ordaindu nahi duzun kopurua: €
00:00
1. Txoritxu txilibitaria / Belatzarekin (05:17 / 00:00)
gure ama bere amaren antzera beste emakume eta ama askoren antzera sufrimenduaren harri-jasotzailea izan zen
maitatzeko modu bat galdu dut bat-batean alboan egoteko gorpuzkera bat
nor den naizen hau zer iragazi dugun zeri galarazi diodan sarrera zeri esan nion ezetz betiko betiko ama baino ez zela uste nuenean
zuk badakizu argitu egidazu zer gertatzen den gure hizkuntzarekin gauzak izendatzeko modu bat desager liteke euskalduna izatea ez da aski euskaldunak izatea ez da asko euskalduna ez da aske
jendea desagertu egiten da lehenik mundutik gure oroimenetik ondoren hiltzen dugun jendeak luzaroago irauten digu
bere burua galtzen du itzultzeko premiarik gabe eginez egun bizitzea baino ez ei da eginero bizitzea egin oro bizitzea
ez dut lortzen isildutakoekin bakean elkarbizitzerik bizirik dirauten urruneko heriotzek etengabe gogorarazten didate gure hildakoak lurrazalean dautza ametsetan errugabe epaitzen dut neure burua
ez zaitut behar beste zaindu ez zaitut merezi bezala jagon eman zenidan horrenbesterekin banizun nola mamitu maitasuna ez zaitut behar beste zaindu ez zaitut merezi bezala jagon astia banizukeen eta niretzat gorde dut ikasi nizuna niretzat zure denbora guztia zuretzat ezta hondarrik ere
nahi zenuke zure mina neure egitea baina zure mina ez da nirea nahi zenuke zure hitzez gaitzestea baina zure hitzak ez dira nireak nahi zenuke gorrotoz bizitzea baina zure gorrotoa ez da nire nahi zenuke neure burua zigortzea baina zure zigorra ez da ez da nirea nahi zenuke zure egia buruz ikastea baina zure egia ez da nirea ez dakit kontsolagarri izango zaizun baina zinez diotsut ez gara dena ahazteko nahikoa biziko ez gara dena ahazteko biziko
galdutakoaren bila bazatoz beste giltza batzuk ekarri aldean zabalik utzi zenuen etxea urteak dira alargundu zela
orain ez du sarrailarik xerkatzen nahiago ditu leihoak aukeran iraultzaileen maitemin ustelak eguzkitan biziberritzekoak
berdaturik dituzu beratzen utzitako ametsak aiduru dituzu artega ezkaratzean
aitaren heriotzaren ostean amak indartu zituen habeak aitita jaio aurretik amamak iraunarazi zituen berberak
ongi etorria jasoko duzu omenaldia tematzen bazara jendetza dago zain itxarongelan hormarik ez duen etxe honetan
berdaturik dituzu beratzen utzitako ametsak ihesi doazkizu galdu zenituenak gogoan
argazki erdian ahuspez ur-bazterrean bizkarrez beso eta hankak luze gorputzari itsatsita sehaska umel batean masaila harea artean lo-kukuan ote zaren galdezka dut lotsaizuna
zer entzuten duzu Aylan harea ale bakoitzean zenbat erru zenbat damu zenbat bihotz durduzatu kontzientziaren abaroan aiherga direnean baitan eta zerk kezkatzen zaitu horren hilik horren mutu?
ni ez naiz ezeren inoren akats garai bat baizen gehiago dira nireak berbarako gaurko hau eta datorkeena
txarrantxak hipotekak balio erantsien zergak harresiak gabeziak laikoen mezak esklaboen gaineko enpresak oporren arteko kexak
ez dago lanaldi osoz bizitzerik horrela
norenak dira oinatzak hor dauden lorratzak gorputz arrastoak nork utzi ditu aztarnak horren agerian, denon ohargarri jitoan dabilenari keinuka ari den itsasargia dirudi bideseinale aratza itzuli nahi lukeen alderraiari
norbera dabilen bidean dago askatasuna geuretzat nahi genukeena argitu behar dugu inorentzat onik iristeko esperantza
norbera dabilen bidean dago askatasuna geuretzat nahi genukeena argitu behar dugu inorentzat onik iristeko
atea zabalik utzita joan zen giltzak kanpotik dingilizka eskailburutik begiratu oihu egin eta ausarki jaitsi zituen eskailerak zazpinaka agidanean orkatila bihurrituta herren hasi zuen bidaia
labirintoa bilatu zuen bidegabea ulertzeko irteera aurkitu ordez luberriak ongarritzeko laborria iragazirik arrunkeria bihurtzeraino errekan gora abiatu zen jauzika iturbururaino
apropos sartu zen galsoroan oinetakoak erantsita urteak egin zituen oinez denen bistan desagertuta lokatzetan baretu nahirik porrotaren osteko azkura besaulkia txikitu zuen menostu guztiak gogoan
apropos sartu zen galsoroan
garoan kirikolatza (bis) uzkurra eta baratza beharrik ez dugunona hain da bizimodu latza hain da bizimodu latza garoan kirikolatza
zeru beltzean izarra (bis) pinu artean lizarra garenaz harrotzerako zurituko zait bizarra zurituko zait bizarra zeru beltzean izarra
larrazkeneko langarra (bis) begi ertzeko makarra ez dago etorkizunik ailitza gezur bakarra ailitza gezur bakarra larrazkeneko langarra
Pagaburuko tontorra (bis) garrik gabeko txondorra goikoaren esku fina latza behekoaren lorra latza behekoaren lorra Pagaburuko tontorra
usaintsua ereinotza (bis) nardagarri bekorotza utopiak ezinari daragio heriotza daragio heriotza usaintsua ereinotza
lorategian asuna (bis) zikinarentzat gatzuna galtzaileak lizundu du herriaren maitasuna herriaren maitasuna lorategian asuna
Wafa Idris in memoriam
oliba mikatza izanda nahi zenuke gozoan gozotasun horregatik maite zaitut osoan
kufiya lepoan horra zein gazte doan Wafa! Wafa! Wafa! Wafa! sua bihotzondoan
kufiya lepoan horra zein heldu doan Wafa! Wafa! Wafa! Wafa! sua bihotzondoan
pikondo errea izanda nahi zenuke hostoan hostotasun horregatik maite zaitut osoan
kufiya lepoan horra zein astun doan Wafa! Wafa! Wafa! Wafa! sua bihotzondoan
kufiya lepoan horra zein arin doan Wafa! Wafa! Wafa! Wafa! sua bihotzondoan
mahasti zapaldua izanda nahi zenuke mulkoan harrotasun horregatik maite zaitut osoan
kufiya lepoan horra zein apal doan Wafa! Wafa! Wafa! Wafa! sua bihotzondoan
kufiya lepoan horra zein harro doan Wafa! Wafa! Wafa! Wafa! sua bihotzondoan
etxe apurtua izanda zutik zaude ukoan osotasun horregatik maite zaitut osoan
kufiya lepoan horra zein lerden doan Palestina! Palestina! sua bihotzondoan
kantuz naramala hautsia du hegala Palestina! Palestina! erdiminez Ramallah
|
01¬02¬03¬04¬05¬06¬07¬08¬09¬10¬11¬